Este luns, na terceira sesión do obradoiro xuvenil do proxecto Oia en sepia, recibimos a visita da fotoxornalista Marta G. Brea, quen compartiu con nós a súa experiencia profesional e nos deu algúns truquiños para conseguir boas fotografías.
Marta G. Brea leva case 20 anos traballando como fotoxornalista e actualmente traballa no xornal Faro de Vigo, o decano da prensa nacional (o máis antigo dos diarios que seguen activos). Segundo nos explicou, cando empezou a dedicarse profesionalmente á fotografía aínda non existían ás cámaras dixitais… Todo un reto para conseguir boas fotografías coas que ilustrar as noticias e as portadas de cada día!
Na súa charla explicounos os cambios que os avances tecnolóxicos teñen provocado na súa profesión (especialmente coa aparición da prensa dixital) e tamén nos lembrou a necesidade de traballar sempre de forma ética e non manipular imaxes (si melloralas e editalas, pero sen alterar a realidade).
Tamén nos deu algúns consellos para facer bos encadres e documentar ben as nosas fotografías, incluíndo datos de interese como a data, a autoría e unha breve descrición da imaxe.
Finalmente, gozamos vendo parte do seu marabilloso traballo: imaxes publicadas en prensa, reportaxes fotográficas, traballos presentados a concursos…
Unha xornada na que se mesturou aprendizaxe e diversión!
Oia en sepia 